• Portugaleteko trikitilariaren seigarren diskoa da Aurrez Aurre, zuzeneko kontzertu bati buruzko lehena. Grabazioa aurtengo maiatzean Bilboko Campos Antzokian emandako kontzertukoa da.
• Aburruzagak interpretatutako 17 abestiz osatua, bere ohiko bandarekin eta gonbidatu ugarirekin.
• Musikan, interprete eta konpositore gisa, egindako 20 urteko ibilbideko gai nagusiak biltzen ditu.

Xabi Aburruzaga trikitilari portugaletetarrak bere seigarren diskoa aurkeztu du gaur goizean prentsaurrekoan. Aurkezpena Bilboko Campos Antzokian egin da, diskoa oinarritzen den zuzeneko kontzertua egin zen leku berean, hain zuzen ere.

Aurrez Aurre Xabi Aburruzagak maiatzaren 15ean Bilboko Campos Antzokian eman zuen kontzertuan grabatu zen. Aburruzagarentzat berebiziko beharra izan zen zuzeneko lan bat grabatzea argitaratutako 5 estudio-lanen ibilbidea osatzeko. Publikoarengandik urruntzea, pandemiaren fase gogorrenean behartuta, eta berriz ere berarekin elkartzeak dakarren gozamena izan dira Aburruzaga lan hau abiarazteko bultzatu duen leitmotiv-a.

Gainera, maiatzaren 15ean Bilboko Campos Antzokian emandako kontzertuan Aburruzaga eta bere ohiko musikari laguntzaileak bildu ziren oholtzan, baina baita euskal musikako beste izen handi asko ere, hala nola Xabier Zeberio, Jose Urrejola, Garikoitz Mendizabal edo Gorka Hermosa; eta beste lekutatik etorritako hamaika lagun eta gonbidatu, hala nola, Tanxugueiras galiziarrak.

Aburruzagarentzat gau hura festa bat izan zen eta bere ametsetako bandarekin batera joan zen. Zein oroitzapen hoberik lan diskografiko batean jasotzea baino.

Aurrez Aurre Portugaleteko trikitilari eta konpositoreak markatu duen estilo pertsonalaren erakusgarri da, trikitixa beste instrumentu batzuen parean jarriz eta bere soinuak folketik hurbilago dauden mundu batzuetatik (biolina, mandolina, alboka, txalaparta…) datozenekin nahastuz, pop musikan ohikoagoak diren beste batzuekin (bateria, baxua, gitarra, pianoa…).

Diskoa osatzen duten 17 kantuak erritmo eta gai arragoa dira. Aburruzagaren bizipen pertsonalenei buruzko aipamenak daude, hala nola, ikasketak egin zituen lehen ikastetxearen oroitzapena, aitite-amamen herria edo ilobari eskainitako gaia; paisaiak eta inguruneak gogora ekartzea, Lago di Comotik Urdaibairaino garamatzana, Quebec eta Galiziatik igaroz; eta baita bere musika-erreferenteak omentzeko eta kutsu aldarrikatzaileagoa hartzeko espazioa ere, Palestinako egoerari eskainitako gaian bezala.

Bidaia honek erritmo anitzetatik, porrusaldatik arin arinera, gai melodiko eta lasaiagoetatik festaren eztandara eta erritmo indartsuagoetara garamatza.

Aburruzagak soinu-dokumentu batean islatu ditu zuzenekoan bizi izan zituen sentsazio guztiak, eta bere asmoa publikoak ere sentsazio horiek gogora ekartzea da.

Xabi Aburruzaga

Xabi Aburruzaga (Portugalete, 1978) trikitilari eta konpositoreak 2007an hasi zuen bere ibilbide musikal profesionala, Bizkaiko trikitixa bere lehen diskoarekin, hain zuzen ere interpretazioan bere lehen urteetan lagundu dioten soinu horien aitorpen gisa.

2009an Denboraren naufrago (Elkar) argitaratu zuen, trikitixaren soinua berritzeko eta bere estilo berezia garatzeko asmo argiarekin, sustraiak ahaztu gabe beti ere.

2013an kaleratu zen hirugarren diskoa, Geure. Lan honetan ia gai guztiak berak konposatzen ditu eta letretan egile handiek parte hartzen dute, besteak beste, Kirmen Uribek, Unai Elorriagak eta Iñaki Aurrekoetxeak.

Estiloen fusioa tradiziotik elikatzen da, bikaina, hil edo bizikoa eta jai girokoa den disko batean.

Urte hauetan Aburruzaga jaialdi ospetsuetako eszenatokietan ibili zen eta mundu osoko artista handiekin kolaboratu zuen, trikitiaren erreferentzia bihurtuz.

2016an, KeltiK argitaratu zuen. Bertan, doinu herrikoiek eta konposizio propioek gonbidatzen dute ikuslea irudimenezko bidaia batera biltzera, folk puruenetik jazzaren soinuetara. Bidaia zoragarria unibertso zeltan barrena.

Bere bosgarren albuma, Bost (2019), barnera bidaia pertsonalagoa da. Bizipenak dira lan honen oinarria. Bertan, Aburruzaga konpositorea, interpretea eta zenbait kanturi letra jartzen die, baita abestu ere.

Euskal Herriko, estatuko eta nazioarteko artisten kolaborazioak ez dira falta, folk euskalduna eta zelta, bals bat eta galiziar eta gaztelerazko soinuak batzen dituzten soinuetan banatuta: Yves Lambert (La Bottine Souriante), Jorge Arribas eta Diego Galaz (Feten Feten), Anxo Lorenzo eta Tanxugueiras taldeko pandereteirak, Calum Stewart, Argibel Euba eta Iñigo Galaz

Miren Amurizak, Unai Iturriagak eta Iñaki Aurrekoetxeak idatzi dituzte bost kanturen letrak.

Eta Aurrez Aurrek disko bihurtutako zuzeneko kontzertu baten testigantzarekin osatzen du zirkulu hau.